किन हुँदैछ नेपालगन्जमा रोजगार मेला

कालपृष्ठ समाचारदाता
नेपालगन्ज, १३ चैत
‘स्वदेशमै रोजगारी, स्वदेशमै बास, रोजिदैंन प्रवास, अब गर्ने देश विकास’ भन्ने नाराका साथ नेपालगन्जमा शुक्रबारदेखि दुई दिने बाँके रोजगार मेला हुन लागेको छ ।
नेपालगन्ज उद्योग वाणिज्य संघले नेपालगन्जमा दुई दिने बाँके रोजागर मेला– २०८१ को आयोजना गर्न लागेको छ । स्थानीय रोजगारी प्रवद्र्धन गर्ने उद्देश्यले मेला आयोजना गरिएको संघले जनाएको छ ।
चैत १५ गते शुक्रबार र शनिबार १६ गते नेपालगन्जमा बाँके रोजगार मेला हुनेछ । मेलालाई उपलब्धीमूलक बनाउन विभिन्न तह÷तप्कासँग समन्वय सहकार्य गरिएको संघका महासचिव एवम् मेला संयोजक भीमबहादुर रानाभाटले जानकारी दिनुभयो ।

‘मेलामा यहाँका सबै क्षेत्रको समन्वय सहकार्य हुनको लागि एक चरणमा छलफल गरिएको छ,’ मेला संयोजक रानाभाटले भन्नुभयो, ‘त्यस क्रममा धेरैको सहकार्य हुने छलफल भएको छ । यसले रोजगारीका धेरै अवसर सार्वजनिक पनि हुनेछ ।’
मेलामा श्रम क्षेत्रका बिस्तृत समस्या र सम्भावनाका विषयमा बहस पनि गरिनेछ । त्यसक्रममा नेपालगन्ज किराना व्यवसायी संघ, इट्टा व्यवसायी संघ बाँके तथा विभिन्न उद्योगी व्यवसायी संघ र व्यवसायीहरूसँग छलफलसमेत गरिएको मेला संयोजक रानाभाटले बताउनुभयो ।

………….

मेलालाई सफल र प्रभावकारी बनाउनको लागि संघले निजी क्षेत्रका रोजगारदाता कम्पनीहरूसँग पनि निरन्तर संवाद गरेको संयोजक रानाभाटले बताउनु भयो । उहाँले भन्नु भयो, ‘रोजगार मेलाको प्रभावकारिताको लागि सरोकारवालाका साथै यहाँका सबै स्थानीय तहहरुसँग पनि सहकार्य गरिएको छ । मेलाको प्रभावकारीतालाई व्यापक बनाउनको लागि यहाँ सबै पालिकाका रोजगार सेवा केन्द्र प्रमुखहरुको पनि सक्रियता रहेको छ ।’ धेरैभन्दा धेरैको लागि रोजगार प्रवद्र्धन गर्ने अवसर प्रदान गर्न सरोकारवालाहरू बीच ‘प्यानल डिस्कसन’ समेत गरिनेछ ।

रोजगार मेलामा तालिम प्रदायक संघ, संस्थालाई समेत आमन्त्रण गरिएको नेपालगन्ज उपमहानगरपालिकाका रोजगार शाखा प्रमुख मञ्जु ज्ञवालीले बताउनुभयो । शैक्षिक बेरोजगारहरूको लागि रोजगारको सुनिश्चितता तालिम प्रशिक्षणले सम्भव हुन्छ ।’ रोजगार संयोजक ज्ञवालीले भन्नुभयो, ‘मेलामा सामाजिक सुरक्षा कोषबारे जानकारी दिन स्टल पनि राखिनेछ ।

‘उद्योगमा दक्ष-अदक्ष सबैखाले जनशक्तिको आवश्यकता रहेको हुन्छ’, संघका प्रथम उपाध्यक्ष चिरन्जिवी ओलीले भन्नुभयो, मेलाले रोजगारी खोजिरहेकाहरूसँग रोजगारदाताहरूको प्रत्यक्ष भेट हुनेछ ।
यसरी उहाँहरुबीचको सहभागिताले पुलको काम हुनेछ, संघको उपाध्यक्षसमेत रहनुभएका प्रथम उपाध्यक्ष ओलीले भन्नुभयो ‘यसले सकारात्मक सुरुवात हुन्छ ।’ संघले स्थानीय सरकारसँग हातेमालो गरेर बेरोजगारलाई रोजगारीसँग जोड्ने र स्वरोजगारसमेतको पहल हुने प्रथम उपाध्यक्ष ओलीले बताउनुभयो । उहाँका अनुसार त्यसका बाँकेका साना, ठूला रोजगार प्रदायक कम्पनीहरूसँग भेटघाट भएको छ ।

संघका अनुसार मेलामा उद्योगी व्यवसायी तथा कम्पनीहरुको स्टलहरु हुनेछ । ती स्टलहरुले आफ्ना उद्योग तथा कम्पनीहरुमा रोजगारको प्रकार र सख्ंयाका बारेमा जानकारी दिने छन् भने रोजगार खोजेकाले आवश्यकता अनुसारको कम्पनी तथा उद्योगसँग सहकार्य गरेर आफ्नो कामलाई सुनिश्चित गर्न सक्ने छन् ।

सरकारले रोजगारीको सुनिश्चितताका लागि हरेक पालिकामा रोजगार शाखाको व्यवस्था गरेको छ । यसरी हरेक पालिकाले आफ्नो पालिकामा बेरोजगारहरुको विवरण संकलन गरेर राखेको छ । मेलामा बेरोजगारको विवरण भरेका त्यस्ता व्यक्तिहरुको सहभागिता हुनेछ । प्रथम उपाध्यक्ष ओलीका अनुसार मेलामा पालिकामा भएका बेरोजगारहरुलाई सहभागिता गराउन आवश्यक पहल गरिएको छ ।

‘गाउँपालिकाहरुले संकलन गरेको बेरोजगारहरुको तथ्याँक अनुसारका व्यक्तिहरुलाई पनि सहभागि गराइनेछ,’ प्रथम उपाध्यक्ष ओलीले भन्नुभयो, ‘बेरोजगारले चाहेको रोजगार पाउनका लागि हरेक पालिकाले ती सबै बेरोजगारलाई मेलास्थलसम्म ल्याउने वातावरण तयार गरेको छ जसले रोजगारदातासँगको भेट सहज बनाउनेछ ।’
मेलाले युवाहरुलाई स्वदेशमै व्यवसाय र उत्पादनशिल क्षेत्रमा लाग्न अभिप्रेरित गर्ने नेपालगन्ज उद्योग वाणिज्य संघका कोषाध्यक्ष मख्खन बहादुर धामीले बताउनुभयो । उहाँले भन्नु भयो, ‘यो मेलाले युवाहरुमा सकारात्मक सम्भावनाको उजागर गर्दै आर्थिक क्षेत्रको विकासमा योगदान गर्ने हाम्रो विश्वास छ ।’

……….

रोजगार मेलामा रोजगारदाताको उत्साहजनक सहभागिताका महत्वपूर्ण सहकार्यहरु पनि संघले गरेको जनाएको छ । संघले यसलाई दक्ष जनशक्तिको खोजी, तयारीसँगै बेरोजगारहरूको व्यवस्थापन गर्ने अभियान मानेको छ । मेलामा करिब १० हजार जनाको सहभागिता हुने संघको अनुमान छ ।