सभापति खाँले मनोमानी ढंगले क्रियाशिल सदस्य फारम वितरण गरेको आरोप

कालपृष्ठ समाचारदाता
नेपालगन्ज, २६ मंसिर

नेपाली कांग्रेसका महासमिति सदस्य लक्ष्मीनारायण शाहले बाँके क्षेत्र नम्बर–३ सभापतिले आफनो मनोमानी ढंगले क्रियाशिल सदस्यताको फारम वितरण गरेको आरोप लगाउनु भएको छ । पार्टीको केन्द्रिय निर्देशन विपरित क्षेत्रीय सभापति नक्की खाँले क्रियाशिल सदस्यता वितरण गरिरहेको भन्दै त्यसको बारेमा शाहले सार्वजनिक रुपमा आपत्ति जनाउनु भएको छ ।

उहाँले भन्नु भयो, ‘नेपाली कांग्रेस केन्द्रिय कार्यसमितिको परिपत्र बमोजिम प्रदेश, पालिका हुँदै वडा बाट वितरण हुनु पर्ने क्रियाशील सदस्यता फाराम नेपाली कांग्रेस बाँके क्षेत्र नम्बर ३ का क्षेत्रीय सभापति मो. नक्की खानले आफ्नो मनोमानी ढंगले वितरण गरिरहनु भएको छ । यो पार्टीको निर्देशन विपरितको कार्य हो । क्षेत्रीय सभापति खाँले गरेको क्रियाकलापको बारेमा निस्पक्ष छानविनको लागि म अपिल गर्दछु ।’

उहाँले अगाडी भन्नु भयो, ‘सत प्रतिशत बितरण हुनुपर्ने क्रियाशिल सदस्य आंशिक रूपले आफ्नो निकटका व्यक्तिहरुलाई बोलाई बितरण गरिएको छ । स्थानीय नेता तथा वडा सभापतिले समेत यसको बिरोध गरिरहनु भएको छ । यो समस्यालाई जिल्ला कार्यसमिति र केन्द्रिय कार्यसमितिले समयमै विवाद समाधान गरी क्षेत्रीय सभापतिलाई कारवाही गर्नु पर्छ ।’ कांग्रेस महाधिवेशन आगामी पुस २६ देखि २८ गते सम्म हुँदैछ ।

नेपाली कांग्रेसका सात तह (वडादेखि केन्द्रसम्म) मा विस्तारित कार्यसमितिहरूमा रहन पार्टीको क्रियाशील सदस्यता अनिवार्य मानिन्छ । क्रियाशील सदस्यहरूबाटै कांग्रेसले महाधिवेशन प्रतिनिधिहरू छनोट हुन्छन् । नेतृत्व चयनको निम्ति महाधिवेशन प्रतिनिधिहरूले मतदान गर्छन् ।