नेपाल अफ्रो– एसियाली जनएकता संगठनको वाण्डुङ्ग सम्मेलनको ७१ औं वर्षगाँठ सम्पन्न

‘नेपालले अर्थ कुटनीतिमा ध्यान दिनुपर्ने बेला आएको छ’

कालपृष्ठ समाचारदाता
काठमाडौं, १७ वैशाख
नेपाल अफ्रो–एसियाली जनएकता संगठनले वाण्डुङ्ग सम्मेलनको ७१ औं वर्षगाँठ भव्यतापूर्वक मनाएको छ । काठमाडौंको होटल एल्लो प्यागोडामा एक कार्यक्रम आयोजना गर्दै संगठनले वर्षगाँठ मनाउदै असंलग्न आन्दोलनको महत्वबारे छलफल गरेको हो । नेपाल अफ्रो– एसियाली जनएकता संगठनका अध्यक्ष कृपासुर शेर्पाको अध्यक्षतामा भएको कार्यक्रममा उपाध्यक्ष निरोज मास्केले कार्यक्रमको सहभागिलाई धन्यवाद ज्ञापन गर्नु भएको थियो । नेपालको परराष्ट्र नीतिलाई प्रभावकारी बनाउन कार्यक्रमले महत्वपुर्ण भुमिका खेलेको बताउँदैं कार्यक्रमलाई सफल बनाउन सक्रिय रुपमा सहयोग गर्नु हुने सम्पुर्णलाई उपाध्यक्ष मास्केले धन्यवाद दिनु भएको थियो ।

‘नेपाल तीन ढुङ्गाबीचको तरुलको रुपमा उभिन पुगेको छ । नेपालले अर्थ कुटनीतिमा ध्यान दिनुपर्ने बेला आएको छ । नेपालले कुनै राष्ट्रको पक्षमा उभिने स्थिति बनेमा यसले नेपाललाई ठूलो प्रभाव पार्ने र अस्थित्वमाथि नै प्रश्न उठ्नसक्छ ।’, पूर्वराजदूत एवम् परराष्ट्रविद् हिरण्यलाल श्रेष्ठले भन्नु भयो ।

कार्यक्रममा सरकारले नेपाललाई बफर स्टेटबाट भाइब्रेन्ट ब्रिज बनाउने भन्दै गरेको घोषणालाई समेत खरो टिप्पणी गर्नु भयो । नेपाल बफर स्टेट कहिल्यै नभएको र हुन नसक्ने भनेका परराष्ट्र क्षेत्रका जानकारहरुले नेपालले आफ्नो परराष्ट्र नीति र वाण्डुङङ्ग सम्मेलनको उद्देश्यलाई थप अपनत्व लिनुपर्नेमा जोड दिए । ‘वाण्डुङ्ग सम्मेलन नेपालको स्वतन्त्रतालाई जोगाउने मामलामा महत्वपूर्ण हिस्सा बन्न पुग्यो । अबका दिनमा पनि सरकारले असंलग्न परराष्ट्र नीतिमा प्रतिबद्ध र कटिबद्ध राख्दै नेपाली भूमिलाई अन्य राष्ट्रको पक्षमा प्रयोग हुन नदिनु नै हाम्रो प्रमुख दायित्व हुन्छ ।’, प्रमुख अथिति रहेका पूर्वपरराष्ट्रमन्त्री एवम् नेपाली सेनाका लेफ्टिनेन्ट जनरल बालानन्द शर्माले भन्नु भयो ।

कार्यक्रममा पूर्वपरराष्ट्रमन्त्री बालानन्द शर्मा, पूर्वराजदूत एवम् परराष्ट्रविद् हिरण्यलाल श्रेष्ठ, पूर्वराजदूत प्राडा मोहनप्रसाद लोहनी, पूर्वराजदूत दिनेश भट्टराई लगायतका शीर्षस्थ व्यक्तिहरुको सहभागीता रहेको थियो ।

कार्यक्रमको बारेमा महासचिव प्रा.डा. गोपाल पोखरेल ‘विवस’ले स्पष्ट पार्नु भएको थियो ।  सचिव अनु शर्माले स्वागत मन्त्व्य राख्नु भएको कार्यक्रममा प्रा.डा. मीना वैद्यले कार्यपत्र प्रस्तुत गर्नु भएको थियो । सदस्य मन्दिरा भण्डारीले गद्य कविता र आप्सो नेपाल उपाध्यक्ष एवम नेपाल प्रज्ञा–प्रतिष्ठानको पुर्व उपकुलपति डा. विष्णुविभु घिमिरेले कविता वाचन गर्नु भएको थियो ।

………

नेपालले असंलग्न आन्दोलन र यसको उद्देश्यलाई पछ्याउनुपर्नेमा जोड दिदै संगठनका महासचिव प्रा.डा गोपाल पोखरेल ‘विवस’ले कार्यक्रमको संयोजन गर्नु भएको थियो । पोखरेल परराष्ट्र मामलामा लामो समयदेखि सक्रिय रहनु भएको छ भने असंलग्न आन्दोलनको पक्षपाति समेत हुनुहुन्छ ।
वाण्डुङ्ग सम्मेलन सन् १९५५ अप्रिल १८ देखि २४ सम्म इन्डोनेसियाको वाण्डुङ्ग सहरमा एसियाली र अफ्रिकी राष्ट्रहरूको सहभागीतामा आयोजित एक ऐतिहासिक सम्मेलन थियो । यसलाई ‘एसिया–अफ्रिका सम्मेलन’ पनि भनिन्छ ।