विवादित अडियो सार्वजनिक भएपछि पक्राउ परे आशिष

कालपृष्ठ समाचारदाता
नेपालगन्ज, १२ असोज

नेपाल सरकारका गृहमन्त्री सुधन गुरुङको सचिवालयका व्यक्तिलाई बदनाम गराउने गरी सार्वजनिक भएको अडियोमा संलग्न बाँकेका आशिष मल्ल भनिने धर्मराज मल्ललाई प्रहरीले पक्राउ गरेको छ । मल्ललाई बाँकेबाट पक्राउ गरेर जिल्ला प्रहरी परिसर काठमाडौं लगेर थप अनुसन्धान गरेर कारबाही अगाडी बढाईरहेको प्रहरीले जनाएको छ । पक्राउ परेका मल्ल विवादमा आइरहने व्यक्ति हुन ।

गृहमन्त्रीको मान्छेसँग निकट सम्बन्ध रहेको भन्दै फोन संवाद गरेको आरोपमा उनलाई पक्राउ गरेको प्रहरीले जनाएको छ । पक्राउ पर्नेमा बाँकेको नेपालगञ्ज उपमहानगरपालिका–४ घर भएका ३७ वर्षीय मल्ल रहेका छन् । उनलाई जिल्ला प्रहरी परिसर काठमाडौंको टोलीले उनलाई पक्राउ गरेको हो ।

मल्ल र बाँकेका अर्का पत्रकार हेमन्त चौधरीबिचको सम्बादमा गृहमन्त्रीका मान्छेसँग सम्बन्ध रहेको भन्दै मोलमोलाइ गरेको अडियो समेत सार्वजनिक भएको थियो । जसमा डिभिजन वन कार्यालयको विभिन्न जिल्लाका हाकिमलाई सरुवा गरेको र जेलमा कर्मचारी भर्ति गर्दा आउने कमिसनको बारेमा कुराकानी गरिएको छ ।

पक्राउ परेका मल्लविरुद्ध ६ वटा मुद्दाहरू रहेको समेत खुलेको परिसरका एसपी तथा प्रवक्ता दानबहादुर थापाले बताउनु भयो । अडियोबारे वास्तविकता बुझ्न सोधपुछ गर्दा उल्टै प्रहरीमाथि नै अभद्र व्यवहार गरेको प्रहरीले जनाएको छ । उनीविरुद्ध अभद्रको कसुरमा २ दिनको म्याद लिइएको छ । बाँकेमा उनीविरुद्ध दूरसञ्चार ऐनको कसुरमा मुद्दा दर्ता भएको थियो । उक्त मुद्दामा उनी फरार रहेको समेत प्रहरीको बताएको छ । मल्ल विरुद्ध बाँकेमै ३ वटा अभद्र १ वटा ठगी र १ वटा बैंकिङ कसुरको मुद्दा रहेको प्रहरीले बताएको छ ।