छठलगत्तै स्थतिग भएका सबै परीक्षा हुने, दशैं अगाडि कार्यतालिका सार्वजनिक : त्रिवि

काठमाण्डौ, ७ असोज । त्रिभुवन विश्वविद्यालय (त्रिवि)ले कोरोना भाइरस महामारीका कारणले स्थगित भएका परीक्षा सञ्चालनको तयारी गरेको छ।

त्रिवि कार्यकारी परिषद्, परीक्षा सुधार तथा समन्वय परिषद् र केन्द्रीय परीक्षा सञ्चालन समितिको मङ्गलबार बसेको बैठकले छठलगत्तै कोरोनाका कारण स्थगित भएका परीक्षा सञ्चालन लागि तयारी गर्न सम्बन्धित कार्यालयलाई निर्देशन दिने निर्णय गरेको हो।

परीक्षा नियन्त्रण कार्यालयका परीक्षा नियन्त्रक पुष्पराज जोशीले दिएको जानकारी अनुसार त्रिविले विद्यार्थीलाई पायकपर्ने ठाउँबाट नै परीक्षा दिने वैकल्पिक व्यवस्थासहित छठलगत्तै परीक्षाको तयारी थाल्न निर्देशन दिइएको हो।

त्यस्तै त्रिविले कोरोनाका कारण स्थगित भएका सबै परीक्षा छठलगत्तै गर्ने गरी दशैँ अगाडि नै परीक्षाको कार्यतालिका सार्वजनिक गर्न सम्बन्धित डिन कार्यालयलाई पत्रचारसमेत गरिसकेको छ भने विद्यार्थी थोरै भएका परीक्षा भने दशैँ र तिहारको बीचमा गर्नेसक्ने त्रिविले जनाएको छ।

परीक्षा नियन्त्रक जोशीले भनेका छन, “यही अहिलेको स्थितिमा हामी छठपछि परीक्षा लिने तयारीमा रहेको छौँ र स्थिति अहिलेको भन्दा जटिल भयो भने फेरि पनि के गर्ने भन्ने हुन्छ, होइन भने छठपछि सबै परीक्षा हुन्छन्।”

त्यसैले आजै नै पनिकाले सबै डिन कार्यालयलाई परीक्षाको तयारी थाल्नका लागि परिपत्र गर्ने उनले जानकारी दिएका छन्।

त्रिविका रजिष्ट्रार प्रा. डा. पेशल दाहालका अनुसार त्रिविले भौतिक दूरी र स्वास्थ्यको मापदण्ड तोकेर परीक्षा लिने व्यवस्था गर्नेछ भने पनिकाले वार्षिक परीक्षा र सम्बन्धित डिन कार्यालयले सेमेष्टर परीक्षा लिने छन् र स्थगित भएका सबै परीक्षा सञ्चालन गर्नका लागि तयार गर्न सम्बन्धित कार्यालयलाई निर्देशन दिइसकेको छ।

रजिष्ट्रार प्रा. डा. दाहालले सम्बन्धित सबै कार्यालयलाई छठलगत्तै परीक्षा सञ्चालनका लागि आवश्यक तयारी गर्न निर्देशन दिइसकेको हुनाले अब चाँडै नै परीक्षाको सञ्चालनको तयारीमा ती कार्यालय जुट्नेछन् र भौतिकरुपमा विद्यार्थीलाई उपस्थित गराएर परीक्षा लिन निर्देशन दिएको बताएका छन्।

उनका अनुसार त्रिविले अहिले पनि न्यूनसंख्या भएका परीक्षा सञ्चालन गरिरहेको छ भने फाराम भरेकाको परीक्षा पहिले गर्ने र त्यसपछि अन्य परीक्षा सञ्चालन गरिनेछ।

रजिष्ट्रार प्रा डा दाहालले माघसम्म सबै परीक्षा सकाएर आगामी फागुन÷चैतदेखि पढाइ सञ्चालन गर्ने तयारी रहेको जानकारी दिएका छन्।

यसैगरी कोरोना भाइरस महामारीका कारणले त्रिविका चैतदेखि सञ्चालन हुने सबै परीक्षा स्थगित भएका छन् । अत्यन्तै न्यून भएका परीक्षा भने त्रिविले अहिले पनि भौतिक दूरी कायम राखेर सञ्चालन गरिरहेको छ ।

त्रिविले सेमेष्टरको भर्चुअल परीक्षा गर्नेबारे छलफल गरे पनि अब नगर्ने बताउँदै परीक्षा नियन्त्रक जोशीले केही डिन कार्यालयले सेमेष्टर प्रणाली परीक्षा भर्चुअल गर्ने भने पनि अब विद्यार्थीलाई भौतिक उपस्थिति गराएर परीक्षा गर्ने भएको जानकारी दिएका छन्।

कोरोना भाइरस महामारीका कारणले केही विश्वविद्यालयले खुला किताब (ओपन बुक) प्रणाली लागू गरेर भर्चुअल विधिबाट परीक्षा लिएका छन्।