पर्वको दिन परीक्षा राखिएको भन्दै मुस्लिम समुदायको आपत्ति

समीर अली बेहना
नेपालगन्ज, १७ असार
त्रिभुवन विश्वविद्यालयले वार्षिक परीक्षा मुस्लिम समुदायको इदुल अजाह पर्वको दिन राखेको भन्दै मुस्लिम समुदायका विद्यार्थी तथा अगुवाहरुले आपत्ति जनाएका छन् । सार्वजनिक गरिएको सूचनामा बिबिएस, बिबिए , बिएससिको परीक्षा मुस्लिम समुदायको महान पर्व इदुल अजहाको दिन तोकिएको छ ।
त्रिभुवन विश्वविद्यालयले श्रावण ५ गतेदेखि बिएससी दोस्रो बर्ष, बिबिएस दोस्रो वर्ष र बिए दोस्रो वर्षको परीक्षा लिने तालिका सार्वजनिक गरेको छ । साउन ६ गते मुस्लिम समुदायको दोस्रो ठुलो चाड इद-उल-अजहाको दिन समेत ३ वटै संकायको परीक्षा राखिएको छ ।
नेपाल वल्मा काउन्सिल बाँके तथा बर्दियाका संयोजक मुफ्ती मोहम्मद कैफुल्वरा खानले पर्वकै दिन परीक्षा राख्नु र मुस्लिम समुदायको महान पर्वहरुमा सार्बजनिक विदा कटौती गर्नु चिन्ताजनक विषय भएको बताइन् । मुस्लिम समुदायका पर्व ईदुल फित्र, ईदुल अजहा र ईदे मिलादुन नबिको सार्वजनिक विदा कटौती गरी सरकारले धर्म निरपेक्षताको उल्लंघन गरेको उनको आरोप छ ।
नेपालगन्ज मुस्लिम समाज संस्था बाँकेका महासचिव तथा नेपाल मुस्लिम आयोगको केन्द्रिय सदस्य मेराज अहमद हल्वाइले नेपाल सरकारले मुस्लिम समुदायको महान पर्व कटौती गरेर चित्त दुखाउने काम गरेको बताए । ‘त्यसैमाथि परीक्षा तालिका नै पर्वलाई वेवास्ता गरेर तय गरिनु झन् दुःखद हो,’ उनले भने । विश्वविद्यालयले तालिका हेरफेर गरेर मुस्लिम समुदायको भावनाको सम्मान गर्नुपर्ने हल्वाइले बताएका छन् ।