मंसिर २० गते महासचिवको पुनः मतगणना गर्ने निर्णय

कालपृष्ठ समाचारदाता
नेपालगन्ज, १४ मंसिर

नेपालगन्ज उद्योग वाणिज्य संघका उप–महासचिव टेक बहादुर खड्काको अध्यक्षतामा बसेको बैठकले महासचिव पदको मतगणना पुनः गर्ने निर्णय गरेको छ ।

बुधबार खड्काको अध्यक्षतामा बसेको बैठकले आगामी मंसिर २० गते महासचिव पदको मतगणना पुनः गर्ने निर्णय गरेको हो । त्यसका लागि एक अधिकृतको संयोजकत्वमा तिन सदस्य टोली गठन गर्ने समेत निर्णय गरिएको छ । उप–महासचिव खड्काले जिल्ला प्रशासन कार्यालय बाँकेलाई पत्र लेखेर त्यसको जानकारी समेत पठाएका छन् । खड्काले शान्ति सुरक्षाको लागि जिल्ला प्रहरी कार्यालय बाँकेलाई पनि अनुरोध गरेका छन् ।

यसअघि भएको संघको निर्वाचनमा महासचिव पदका उम्मेदवार टंक प्रसाद शर्माले पुनः मतगणना गरी पाउन संघको विधान २०५३ को धारा ४४ बमोजिम उजुरी दिएका थिए । संघको विधानमा रहेको धारा २८(६) बमोजिम बुधबार बोलाइएको बैठकले आगामी मंसिर २० गते महासचिव पदको पुनः मतगणना गर्ने निर्णय गरेको हो । बुधबार बसेको बैठकमा भने अध्यक्ष लगायत शिर्ष पदाधिकारी र सदस्यहरुको सहभागिता रहेको थिएन ।

…………

नेपालगन्ज उद्योग वाणिज्य संघमा निर्वाचन अघि देखि नै विवादित बन्दै आएको थियो । विभिन्न राजनितिक समुह विभाजित भएका नेताहरुले एक अर्कालाई आरोप प्रत्यारोप लगाउँदै आएका छन् । निर्वाचन अघि सदस्यताको विषयमा विवाद भएको थियो । पछि मतगणनामा पनि त्यसले निरन्तरता पायो । निर्वाचन सम्पन्न भैसकेपछि अहिले नेपालगन्ज उद्योग वाणिज्य संघ सार्वजनिक रुपमा दुई फरक कित्तामा विभाजित भएको छ ।