सरकारले आफनो गल्ती लुकाउन प्रेस माथि आक्रमण गरिरहेको छः नेता वाल्मिकी

कालपृष्ठ समाचारदाता
नेपालगञ्ज, जेठ १२ गते

संविधान सभा सदस्य एवम् नेपाली कांग्रेसका केन्द्रिय सदस्य मैकुलाल वाल्मिकीले सहकारी पिडितलाई न्याय दिन चासो दिनु पर्ने बताउनु भएको छ । पछिल्लो समय देशभर ७३ लाख सहकारीका सदस्यहरु कुनै न कुनै समस्याहरुबाट पिडित भैरहेको बेला सरकारले यस तर्फ चासो दिनु पर्ने उहाँले बताउनु भएको छ ।

जनताको दुःख गरेर कमाएको पैसा अपचलन गरिरहेका सहकारीको निस्पक्ष छानविनमा गर्न ढिलासुस्ती गरेर सरकारले गम्भिर त्रुटि गरिरहेको संविधान सभा सदस्य वाल्मिकीले बताउनु भयो ।

उप प्रधानमन्त्री तथा गृह मन्त्री रवि लामिछानेले सहकारीको यथार्त समाचार लेखेका कारण सरकारले कान्तिपुर मिडिया ग्रुपका अध्यक्ष कैलाश सिरोहियालाई पक्राउ गरेको केन्द्रिय सदस्य वाल्मिकीले आरोप लगाउनु भएको छ । उहाँले भन्नु भयो, ‘कान्तिपुर दैनिकका अध्यक्षको दोहोरो नागरिकता भएको आरोप लगाउँदैं उहाँलाई प्रक्राउ गरिएको छ । नेपालमा नागरिकताको बारेमा धेरै समस्या छन । गृह मन्त्री ज्युकै दोहोरो राहदानी र नागरिकता छ । उहाँलाई किन सरकारले कारबाहाी गरेको छैन । प्रक्राउ गरेको छैन ।’

वर्तमान सरकारले आफनो कमजोरी लुकाउनको लागि प्रेस माथि आक्रमण गरिरहेको उहाँले आरोप लगाउनु भयो । उहाँले भन्नु भयो,‘निम्न आय भएका मानिसले जीवनभर कमाएको रकम सहकारीले हिनामिना गरेको छ । यस्तो गम्भिर ठगीमा गृहमन्त्री मुछिनु भएको छ । अब गृह मन्त्रीले आफनो पदबाट राजिनामा दिएर छानविन प्रक्रिया अगाडी बढाउनु पर्छ । अनि यर्थात कुरा बाहिर आइहाल्छ ।’

अब नेपाली कांग्रेसले संसद र सडक दुबै ठाउँमा जनताका मुद्दालाई सम्बोधन गर्न आन्दोलन सुरु गर्ने उहाँले बताउनु भयो ।
क्रमवद्ध रुपमा कान्तिपुरले सहकारीले समाचार लेखेको कारण प्रतिसोध साध्न सिरोहियालाई अहिले पक्राउ गरिएको हो । वाल्मिकी भन्नु हुन्छ, ‘सिरोहियाको बारेमा पनि छानविन हुनु पर्छ । उहाँले गल्ती गर्नु भएको छ भने कारबाही होला । तर कान्तिपुरको कार्यालयमा गएर देशद्रोही जस्तो अपराध गरेको जसरी उहाँलाई प्रक्राउ गर्नु निन्दनीय छ । यसको हामी बिरोध गछौं ।’