लागू औषधसहित बाँकेमा दुई जना पक्राउ

कालपृष्ठ समाचारदाता
नेपालगन्ज, १८ असार

बाँकेमा ठुलो परिमाणको लागू औषध अफिमसहित दुई जना पक्राउ परेका छन् । जिल्ला प्रहरी कार्यालय बाँकेका अनुसार सोमबार बाँकेको कोहलपुर वडा नं–१४ बाट आफिमसहित दुई जना पक्राउ परेका हुन् ।

गस्तीमा खटिएको इलाका प्रहरी कार्यालयको टोलीले लागू औषध अफिमसहित बर्दियाको बाँसगढी नगरपालिका वडा नं–९ माछागढका ५५ वर्षीय राम बहादुर शाही र जाजरकोटको बारेकोट गाउँपालिका वडा नं–८ सेपुखोलाका २५ वर्षीय पूर्ण बहादुर बिकलाई पक्राउ गरेको हो ।

शाही र बिक कोहलपुर वडा नं–१४ स्थित ह्याप्पी वल्र्ड फनपार्क अगाडी बसिरहेका बेला प्रहरीले शंका लागेर चेकजाँच गरेको थियो । जिल्ला प्रहरी कार्यालय बाँकेका प्रवक्ता नारायण डाँगीले शंका लागेर चेकजाँच गरेपछि बिकले पछाडी बोकेको कालो झोलामा लागू औषध भेटिएको जानकारी दिनुभयो ।

उहाँका अनुसार प्रहरीले उनीहरुको साथबाट ५ किलो ८६५ ग्राम लागू औषध भेटिएको र एक वटा मोटरसाईकल नियन्त्रणमा लिएको छ । प्रहरीले शाहीको कर्णाली प्रदेश ०२–००२ प ११८६ नम्बरको मोटरसाईकल समेत घट्नास्थलबाट बरामद गरेको हो ।

जाजरकोटको शिवालय गाउँपालिका वडा नं–७ भिउस घर भएका शाही हाल बर्दियाको बाँसगढी बस्दै आएका छन् । उनीहरुलाई जिल्ला अदालत बाँकेमा उपस्थित गराई म्याद थप गरेर अनुसन्धान शुरु गरिएको बाँके प्रहरीले जनाएको छ ।