नेपालगन्ज भन्सारमा स्क्यानर मेसिन नहुँदा समस्या

कालपृष्ठ समाचारदाता
नेपालगन्ज, ११ मंसिर

नेपालगन्ज भन्सार कार्यालयको जमुनाह नाकास्थित यात्रु आगमन कक्षमा ‘लगेज स्क्यानर मेसिन’ नहुँदा मालसमान जाँचपासमा समस्या हुने गरेको छ ।

भन्सार परीक्षणलाई पारदर्शी र छिटोछरितो बनाउनका लागि नेपाल–भारत सीमा क्षेत्र जमुनाहा नाकास्थित यात्रु आगमन कक्षमा राखिएको ‘लगेज स्क्यानर मेसिन’ छ वर्षदेखि बिग्रिएर थन्किएपछि भन्सार कर्मचारीले हातैले मालसामान छामेर जाँच गर्नुपर्ने बाध्यता रहेको छ ।

अन्तर्राष्ट्रिय सीमा नाकाको संवेदनशीलतालाई बुझेर भन्सार परीक्षणलाई पारदर्शी, सरल तथा सहजता दिनका लागि भन्दै भन्सार विभागले २०७४ सालमा नेपालगन्ज भन्सार कार्यालयलाई लगेज स्क्यानर मेसिन खरिद गरी पठाएको नेपालगन्ज भन्सार कार्यालयका सूचना अधिकारी पूर्णप्रसाद लम्सालले जानकारी दिनुभयो ।

लम्सालका अनुसार, उक्त मेसिन जमुनाहा नाकास्थित भन्सार कार्यालयको यात्रु आगमन कक्षमा लगेर राखेको दुई वर्षपछि उक्त मेसिन बिग्रिएको थियो । हालसम्म पनि मर्मत गरिएको छैन । दैनिक हजारौँको संख्यामा सर्वसाधारण यात्रु नेपालबाट भारततर्फ र भारतबाट नेपालतर्फ पैदल आउँजाउँ गर्ने उक्त नाकामा मेसिन बिग्रिँदा भन्सार कर्मचारी र सुरक्षाकर्मीले सामान हातैले छामछुम पार्दै जाँच गर्ने गरेका छन् ।

नेपालबाट भारततर्फ जाने सर्वसाधारणका लागि सीमावर्ती भारतीय नाका रूपैडिहामा भारतीयको ‘एसएसबी’ ले राखेको स्क्यानरमा मालसामान जाँच गराउने व्यवस्था छ । एसएसबीले मालसमानको मात्र नभएर प्रत्येक व्यक्तिका लागि अलग्गै स्क्यानरको व्यवस्था गरेको छ । एकातिर मालसामानको स्क्यान हुन्छ भने अर्कोतिर व्यक्तिको स्क्यानिङ हुन्छ ।

मेसिन सञ्चालन नहुँदा सामान जाँचमा बढी समय लाग्दा गन्तव्यमा छिट्टै पुग्नुपर्ने बाध्यतामा रहेका यात्रुहरूले पनि झन्झट व्यहोर्नु परिरहेको इलाका प्रहरी कार्यालय जमुनाहका इन्चार्ज प्रहरी निरीक्षक उपेन्द्र बुढाथोकीले बताउनुभयो ।

नेपालगन्ज भन्सार कार्यालयका प्रमुख भन्सार अधिकृत जनार्दन पौडेलले बिग्रेको स्क्यानर मेसिनलाई मर्मत सम्भार गरी सञ्चालनमा ल्याउन कठिन भएकोले नयाँ मेसिन खरिदको लागि पहल भइरहेको जानकारी दिनुभयो । पुरानो मेसिन मर्मतमा धेरै बजेट लाग्ने भएकोले नयाँ स्क्यानर मेसिन खरिद र यात्रु कक्षलाई सुधारका लागि भन्सार विभागमा जानकारी गराएको उहाँको भनाइ छ ।

नेपालगन्ज उद्योग वाणिज्य सङ्घका पूर्व अध्यक्ष कृष्णप्रसाद श्रेष्ठले लगेज स्क्यानर मेसिन सञ्चालन गरेर भन्सारमा कडाइ गर्न सके अवैध ओसारपसारमा कमी आउने बताउनुभयो ।