बाँकेमा ‘बरघर’ प्रथा संरक्षण गरिँदै

कालपृष्ठ समाचारदाता
नेपालगन्ज, २२ मंसिर

जिल्लाको बैजनाथ गाउँपालिकाको थारु समुदायमा रहेको बरघर प्रथा संरक्षण तथा प्रवर्द्धन गर्न थालिएको छ । लोप हुन थालेको बरघर प्रथा संरक्षण र प्रवर्द्धन गर्न थारु अगुवाहरू छलफलमा जुटेका हुन् ।

गाउँपालिकाले बरघर (थारु गाउँको कार्यकारी प्रमुख) प्रणालीको संरक्षण, प्रवर्द्धन र विकास गर्न निर्माण गरिएको विधेयक–२०८१ लाई पूर्ण रूपमा कार्यान्वयन गराउन बैजनाथका ३६ बरघरलाई एकै ठाँउमा ल्याइएको बैजनाथ गाउँपालिकाका उपाध्यक्ष निर्मला रोकायले बताउनुभयो । उहाँले बैजनाथमा थारुको परम्परागत कला, सांस्कृतिक संरक्षण गर्ने र थारु सङ्ग्र्रहालय निर्माण गर्ने प्रतिबद्धता व्यक्त गर्नुभयो ।

उपाध्यक्ष रोकायले थारुहरुको पहिचान हुनेगरी आफ्ना गतिविधि गर्न समुदायका अगुवा तथा युवा अग्रसर हुनुपर्नेमा जोड दिनुभयो । उहाँले आगामी आर्थिक वर्षको नीति तथा कार्यक्रममा विभिन्न आत्मनिर्भरका तालिमहरू समावेश र सञ्चालन गर्नेगरी योजनाको प्रस्ताव पेस गर्न बरघरसँग अनुरोध गर्नुभयो ।

“कला, संस्कृति, रीतिरिवाज, चालचलन, भेषभूषालाई संरक्षण गर्न पालिकाले सबै आर्थिक सहयोग गर्न नसके आफ्नो पहिचान र कला, संस्कृतिको संरक्षण र प्रवर्द्धन गर्न सम्बन्धित समुदाय एकजुट भई योजना बनाएर पालिका तथा सरोकार भएका निकायसँग समन्वय र सहजीकरण गर्नुपर्छ”, उपाध्यक्ष रोकायाले भन्नुभयो ।

बैजनाथको बरघरका अध्यक्ष चन्द्रबहादुर थारुले सबै वडामा समिति तयार भइसकेको बताउँदै बरघरसम्बन्धी विधेयक र आवश्यक कानुन पालिकाले विसं २०८० माघ १८ गते राजपत्रमा प्रकाशन गरिसकेको जानकारी दिनुभयो । साथै बैजनाथ–१ चिसापानीमा माघे सङ्क्रान्तिका दिन माघी महोत्सव आयोजना गर्ने निर्णय भएको उहाँले बताउनुभयो ।

बैजनाथ गाउँपालिकाको आठ वटा वडामा बरघरको नयाँ कार्यसमिति चयन भएको छ । वडा नं १ मा खुसीराम थारु, वडा नं २ मा श्यामुवा थारु, ३ नं वडामा जुगलाल थारु, ४ नं वडामा सोहनलाल थारु, ५ नं वडामा प्रेमलाल थारु, ६ नं वडामा छोटेलाल थारु, ७ नं वडामा महेश थारु र ८ नं वडामा राधेश्याम थारु चयन हुनुभएको छ ।