मेयर कप ब्याडमिन्टनमा आर्मीका कृमोन रिजाल सर्वोत्कृष्ट खेलाडी घोषित

कालपृष्ठ समाचारदाता
नेपालगन्ज, २९ भदौं

बाँके जिल्ला स्तरीय अन्तर विद्यालय मेयर कप तथा बि–लेभल खुल्ला पुरुष डबल्स ब्याडमिन्टन प्रतियोगिता अन्तर्गत पुरुष डबल्स बी–लेभलमा बाँकेका बिजन ओली र राजेश साउदको जोडी प्रथम भएको छ । नेपालगन्ज रंगशाला स्थित कभर्ड हलमा भएको खेलमा बुटवल लाफाका मदन खड्का र सुदिप चौधरी जोडीलाई हराउँदैं बाँकेको टिम च्याम्पियन भएको हो ।

बाँकेका अर्जुन बुढामगर र केशब असलामी मगर तथा बाँकेकै श्रीमान केसी र मुस्कान केसीको जोडी प्रतियोगिताको अन्तिम चारमा प्रवेश गरेका थिए । प्रतियोगितामा नेपाल आर्मीका कृमोन रिजाल सर्वोत्कृष्ट खेलाडी घोषित हुनु भयो । नेपालगन्ज ब्याडमिन्टन क्लबको आयोजनामा भएको दुई दिने प्रतियोगिता अन्तर्गत यु–१५ एकल पुरुष विधामा सुर्खेतका बिपिन केसी प्रथम, कपिलवस्तुका बिराट बस्नेत दोस्रो तथा बाँकेका संस्कार खत्री र सुर्खेतका रविन अधिकारी तेस्रो स्थान हासिल गर्नु भएको छ ।

……..

……….

यु–१५ एकल महिला विधामा कपिलवस्तुकी विल्सना सिंह प्रथम, कैलालीकी चाहना चौधरी दोस्रो तथा कैलालीकै अपिसा गुप्ता र कपिलवस्तुकी केरोल सेनले तेस्रो स्थान हासिल गर्नु भयो । यु–१३ एक पुरुष विधामा कपिलवस्तुका बिराट बस्नेत प्रथम, नेपाल आर्मी क्लबका कृमोन रिजाल दोस्रो, सुर्खेतका रविन्द्र अधिकारी र कपिलवस्तुका सुदेव खनाल तेस्रो हुनु भयो । महिला यु–१३ एकल महिला तर्फको विधामा कपिलवस्तुका केरोल सेन प्रथम, बाँकेकी बुनु क्रिज्मा शाक्य दोस्रो र बाँकेकै आरोसी थापा तेस्रो हुनु भयो ।

कार्यक्रमको समापनको अवसरमा बाँकेको ब्याडमिन्टन विकासमा योगदान गरेको भन्दैं आयोजक नेपालगन्ज ब्याडमिन्टन क्लबले नेपालगन्ज उपमहानगरपालिका नगर प्रमुख प्रशान्त विष्ट र प्रमुख जिल्ला अधिकारी दिल बहादुर तामाङ्गलाई सम्मान गरेको थियो ।
जुनियर स्तरको खेलाडीलाई अवसर दिने उद्देश्यले आयोजना गरेको प्रतियोगिताले थुप्रै खेलाडीलाई अवसर दिएको १०औं दक्षिण एसियाली खेलकुदको कास्य पदक विजेता खेलाडी एवम् नेपालगन्ज ब्याडमिन्टन क्लबका अध्यक्ष अनिल लाखेले बताउनु भयो ।

प्रतियोगिताको विद्यालय स्तरमा आर्कषक पुरस्कार तथा बि लेभल खुल्ला पुरुष डबल्स इभेन्ट्सको विजेता टिमले ३० हजार, उपविजेताले १५ हजार, तेस्रो र चौथो हुने टिमले समान ७ हजार ५ सय रुपैयाँ नगद पुरस्कार पाउने अध्यक्ष लाखेले बताउनु भयो ।
प्रतियोगिताको यु–१३ सिंगल्स छात्र–छात्रा र यु–१५ सिंगल्स छात्र–छात्रातर्फको इभेन्ट्समा १ सय ५० भन्दा बढी खेलाडी सहभागि भएका थिए ।
बी–लेभल खुल्ला पुरुष डबल्स इभेन्ट्समा करिब ८० जना खेलाडीले भाग लिएको आयोजकले जनाएको छ । प्रतियोगितामा त्रिभुवन आर्मी क्लब, बुटवल, भैरहवा, नवलपरासी, सुर्खेत, दैलेख, धनगढी, टिकापुर, पथ्तरकोट, तौलिहवा, नवलपुर, दाङ्ग, गुल्मी लगायतको स्थानबाट आएका खेलाडीले प्रतिस्पर्धा गरेको अध्यक्ष लाखेले बताउनु भयो ।

मध्यपश्चिम क्षेत्रीय खेलकुद विकास समिति नेपालगन्जका प्रशिक्षण प्रमुख एवम् ब्याडमिन्टन प्रशिक्षक जयन्त श्रेष्ठले प्रतियोगिताले बाँकेमा ब्याडमिन्टको गतिविधि बढाउन समेत सहयोग गरेको बताउनु भयो ।

……..

करिब ७ लाख ९९ हजार बजेट रहेको प्रतियोगिता आयोजनाको लागि नेपालगन्ज उपमहानगरपालिकाले मुख्य प्रायोजन गर्नेछ भने राप्तीसोनारी गाउँपालिकाले प्रायोजन र कोहलपुर नगरपालिकाले आर्थिक सहयोग गरेको आयोजकले बताएको छ ।