पोल्याण्डमा कोरोनाको कहर : खेल मैदानलाई बनाइयो अस्पताल

पोल्याण्ड, ४ कात्तिक । कोरोना भाइरस (कोभिड-१९) को महामारीका कारण अस्पताल अपुग भएपछि पोल्याण्डमा मैदानलाई पनि अस्पतालमा रुपान्तरण गरिएको छ । सरकारले खेल राष्ट्रिय रंगशालालाई नै अस्थायी अस्पतालमा परिणत गर्ने निर्णय गरेको हो ।

राजधानी बार्सामा रहेको सो रंगशालालाई अस्पतालमा रुपान्तरण गरिने निर्णय भएको अधिकारीहरुले जानकारी दिएका छन् ।

पोल्यान्ड सरकारका अनुसार झण्डै पाँच सय बिरामीलाई कोठा पुग्नेगरी पुनर्निमाण भइरहेको हो । ती कोठाहरुमा आवश्यकता परेका बिरामीलाई अक्सिजनसहितको व्यवस्था गर्न लागिएको छ ।

तर त्यो अस्पतालका लागि चिकित्सक, नर्सलगायतका स्वास्थ्यकर्मीहरुको पर्याप्त व्यवस्था भने सरकारले कसरी गर्न सक्छ भन्ने बारेमा अहिलेसम्म पनि अस्पष्ट रहेको छ ।

पोल्याण्डमा अहिले स्वास्थ्यकर्मीहरुको कमी भएको छ ।

अस्थायी अस्पताल बनाउन लागिएको रंगशालामा ५८ हजार ५०० जना दर्शक बस्न मिल्ने क्षमता रहेको थियो ।

युरो २०१२ फुटबल च्याम्पियनसिप सञ्चालन गर्नका लागि यसको निर्माण गरिएको थियो । त्यो प्रतियोगिताका लागि पोल्याण्ड र युक्रेनले व्यवस्थापकीय नेतृत्व गरेका थिए ।

पोल्याण्डमा पछिल्लो केही दिनमा थप सात हजार ४८२ जना कोरोनाभाइरसबाट सङ्क्रमित भएका छन् भने ४१ जनाको मृत्यु भएको छ ।