नेपालगन्जमा यसियन पेन्टस च्याम्पियन कप यु–१८ अन्तरविद्यालय फुटबल प्रतियोगिता हुँदै 

कालपृष्ठ समाचारदाता
नेपालगन्ज, १८ भदौ

नेपालगन्जमा विद्यालय तहका युवा फुटबल प्रतिभालाई लक्षित गर्दै ‘‘यसियन पेन्टस च्याम्पियन कप यु–१८ अल नेपाल इन्टर–स्कुल फुटबल च्याम्पियन’’ आयोजना हुने भएको छ ।

नेपालगन्ज–११ स्पोर्टिङ क्लबको समन्वय तथा यसियन पेन्टसको मुख्य प्रायोजनमा आयोजना हुन लागेको प्रतियोगिता द हिमालयले आयोजना गर्न लागेको हो । आयोजकका अनुसार प्रतियोगिताको औपचारिक उद्घाटन २०८३ भदौ २२ गते बिहान ७ बजे नेपालगन्ज स्थित महेन्द्र रंगशालामा हुनेछ । यसअघि भदौ १६ गतेदेखि सञ्चालन गर्ने तयारी गरिएको प्रतियोगिता देशमा उत्पन्न विषम परिस्थितिका कारण समयतालिका परिवर्तन गरी भदौ २२ गतेदेखि सञ्चालन गर्न लागिएको जनाइएको छ ।

विद्यालय तहमा फुटबल खेलको विकास गर्ने, युवा प्रतिभाको पहिचान तथा प्रोत्साहन गर्ने र खेलाडीमा प्रतिस्पर्धात्मक भावना विकास गर्ने उद्देश्यले प्रतियोगिता आयोजना गर्न लागिएको हो । त्यस्तै, खेलकुदमार्फत विद्यार्थी तथा युवा खेलाडीमा अनुशासन, नेतृत्व क्षमता र सकारात्मक सोचको विकासमा समेत सहयोग पुग्ने आयोजकको विश्वास रहेको छ ।

प्रतियोगिताको उद्घाटन समारोहमा सहभागी खेलाडी, विद्यालय, प्रशिक्षक तथा आयोजकलाई थप उत्साह र प्रेरणा मिल्ने अपेक्षा गरिएको छ । नेपालगन्ज–११ स्पोर्टिङ क्लबका स्पोट्र्स कोअर्डिनेटर घनश्याम थापाले प्रतियोगिताको उद्घाटन समारोहमा उपस्थित भई कार्यक्रमलाई सफल बनाउन सम्बन्धित सबै पक्षलाई निमन्त्रणा गरेका छन् ।

विद्यालयस्तरबाटै नयाँ फुटबल प्रतिभाको खोजी र विकास गर्ने लक्ष्यसहित आयोजना हुन लागेको यसियन पेन्टस च्याम्पियन कप यु–१८ प्रतियोगिताले नेपालगन्जको खेलकुद क्षेत्रमा थप उत्साह थप्ने अपेक्षा गरिएको छ ।