नेपालगन्जमा एसियन पेन्टस च्याम्पीयन्स कप यु–१८ सुरु, उद्घाटन खेलमै युनाइटेडको फराकिलो जित

कालपृष्ठ समाचारदाता
नेपालगन्ज, २२ भदौ

नेपालगन्जमा विद्यालयस्तरीय फुटबलको माहोल तताउँदै एसियन पेन्टस च्याम्पीयन्स कप यु–१८ अल नेपाल इन्टर– स्कुल फुटबल च्याम्पीयन्स आजदेखि औपचारिक रूपमा सुरु भएको छ । महेन्द्र रंगशालामा आयोजित समारोहमा नेपालगन्ज उपमहानगरपालिका शिक्षा, युवा तथा खेलकुद महाशाखाका प्रमुख गोरख बहादुर थापाले रेफ्रीलाई बल हस्तान्तरण गर्दै प्रतियोगिताको उद्घाटन गरेका हुन् ।

नेपालगन्ज–११ स्पोर्टिङ क्लबको समन्वय तथा एसियन पेन्टस को मुख्य प्रायोजनमा सञ्चालन भइरहेको प्रतियोगिताको उद्घाटन समारोहमा क्लबका स्पोट्र्स कोअर्डिनेटर घनश्याम थापा, फुटबल प्रशिक्षक, विभिन्न विद्यालयका प्रतिनिधि, प्रशिक्षक, खेलाडी तथा खेलप्रेमीहरूको उपस्थिति थियो ।

…………………..

विद्यालय तहबाटै फुटबल प्रतिभाको पहिचान, विकास र प्रोत्साहन गर्ने उद्देश्यले आयोजना गरिएको प्रतियोगिताको उद्घाटनसँगै महेन्द्र रंगशालामा युवा खेलाडीको जोश र प्रतिस्पर्धा देखिएको छ । प्रतियोगिताले खेलाडीलाई आफ्नो प्रतिभा प्रदर्शन गर्ने अवसर प्रदान गर्नुका साथै अनुशासन, नेतृत्व क्षमता र प्रतिस्पर्धात्मक भावना विकासमा समेत योगदान पुग्ने अपेक्षा गरिएको आयोजकले जनाएको छ ।

प्रतियोगिताको पहिलो दिन भएको उद्घाटन खेलमा युनाइटेड एजुकेशनल एकेडेमीले सिद्धार्थ विद्याशदन, फुल्टेक्रामाथि ५–० को शानदार जित हात पारेको छ । युनाइटेडको जितमा जर्सी नम्बर ९ का प्रसिद्ध कँडेल नायक बने । उनले खेलको ३२औँ, ३९औँ, ४१औँ र ६४औँ मिनेटमा गरी व्यक्तिगत चार गोल गरे। त्यस्तै, जर्सी नम्बर १० का शैलेन्द्र बीसीले ५०औँ मिनेटमा एक गोल थपे ।

……………….

उद्घाटन खेलमै पाँच गोलको फराकिलो जित निकाल्दै युनाइटेड एजुकेशनल एकेडेमीले प्रतियोगितामा दमदार सुरुवात गरेको छ ।
त्यसैगरी, प्रतियोगिताको दोस्रो खेलमा जेनिथ इङ्लिस सेकेन्डरी बोर्डिङ स्कुलले अरुणोदय माध्यमिक विद्यालयलाई २–० गोलले पराजित गरेको छ । जेनिथका जर्सी नम्बर ६ का कवि रावतले २४औँ मिनेटमा टोलीका लागि पहिलो गोल गरेका थिए । खेलको ५४औँ मिनेटमा जर्सी नम्बर ८ का सुवास बीसीले दोस्रो गोल गर्दै जेनिथको जित सुनिश्चित गरे ।

प्रतियोगितामा विभिन्न विद्यालयका १८ वर्षमुनिका खेलाडीहरूले सहभागिता जनाइरहेका छन् । युवा खेलाडीलाई प्रतिस्पर्धात्मक वातावरण प्रदान गर्दै उनीहरूको प्रतिभा राष्ट्रियस्तरसम्म पु¥याउने लक्ष्यसहित प्रतियोगिता आयोजना गरिएको नेपालगन्ज–११ स्पोर्टिङ क्लबका स्पोट्र्स कोअर्डिनेटर घनश्याम थापाले बताए ।

प्रतियोगिताको पहिलो दिनका खेलले नै युवा खेलाडीको उत्साह, प्रतिभा र प्रतिस्पर्धाको स्तर देखाएको छ । नेपालगन्जमा जारी प्रतियोगिताले स्थानीय खेलकुद गतिविधिलाई थप चलायमान बनाउने र आगामी दिनमा नयाँ फुटबल प्रतिभा जन्माउन सहयोग पुग्ने अपेक्षा गरिएको छ ।