बाँकेमा पनि नेकपा एसमा खुल्न थाले जनप्रतिनिधि

कालपृष्ठ समाचारदाता
नेपालगञ्ज, २० भाद्र
नेकपा एमालेबाट बाँकेमा स्थानीय तहमा निर्वाचित केही जनप्रतिनिधिहरुले माधव नेपाल नेतृत्वको नवगठित नेकपा समाजवादी अर्थात नेकपा एस रोजेका छन् । तर, उल्लेखनीय रुपमा पार्टी परित्याग गरेको घोषणा गर्नेहरु देखिएका छैनन् । एमाले परित्याग गरेर अर्को पार्टी रोज्न निर्वाचन आयोगले जनप्रतिनिधिहरुलाई २२ गतेसम्मको समय दिएको छ ।
नेपालगञ्ज उप-महानगरपालिका वडा नम्बर १ का वडा सदस्य डम्बर थापाले नेकपा एमाले परित्याग गरी नेकपा एस रोजेका छन् । आईतबार जिल्ला निर्वाचन कार्यालय बाँकेमा पुगेर थापाले नेकपा एस रोजेका हुन् ।
आईतबारै कोहलपुर नगरपालिका वडा नम्बर ५ का वडा सदस्य शंकर खड्काले पनि नेकपा एमाले परित्याग गरी नेकपा एकीकृत समाजवादी रोजेका छन् । नेकपा एस रोजेपछि उनीहरुले एमालेमा विधि र पद्धतीको अन्त्य भई नेतृत्वले मनपरी ढंगले पार्टी सञ्चालन गर्दा कम्युनिष्ट आन्दोलन नै समाप्त हुन लागेका कारण आफुले एमाले परित्याग गरेको बताएका छन् ।
नेकपा एमाले विभाजन भई नेकपा एस र जसपा विभाजन भई लोसपा गठन भएपछि निर्वाचन आयोगले प्रदेश र स्थानीय तहका जन प्रतिनिधीहरुलाई दल रोज्नका लागि भदौं २२ गतेसम्मको समय दिएको छ । नेकपा एस बाँकेका अध्यक्ष अशोक कोइरालाले २२ गतेसम्म बाँकेमा धेरै जनप्रतिनिधीले नेकपा एस रोज्ने दावी गरेका छन् ।