बाघ आक्रमणबाट स्थानीय घाइते भएपछि सडक अवरुद्ध

बाघ आक्रमणको विषयलाई लिएर स्थानीयले गुलरिया राजापुर सडक अवरुद्ध गरेका छन् । सोमबार बिहान खेतमा काम गर्न गएकी मधुवन नगरपालिका– २ सोनाहा गाउँकी ४१ वर्षीय अस्मिता थारुलाई बाघले आक्रमण गरी गम्भिर घाइते बनायो ।

स्थानीय प्रत्यक्षदर्शीका अनुसार घाइते थारुको दाहिने हात र तिघ्रामा बाघले आक्रमण गरी घाईते बनाएको छ । थारुलाई बाघले आक्रमण गर्दा नजिकै खेतमा काम गरिरहेका अन्य व्यक्तिहरुले हल्ला गर्दा बाघ छोडेर भागेको थियो । घाइते थारुको नेपालगन्जमा उपचार भई रहेको परिवारिक स्रोतले जनाएको छ ।

खाता करिडोर क्षेत्रमा बाघको आक्रमण रोकिएको छैन् । १३ दिन अघि मात्र बाख्रा चराउन गएकी ४९ वर्षिय महिलालाई बाघले आक्रमण गरी शिकार बनाएको थियो ।

खाता करिडोर क्षेत्र अन्र्तगत बाघको आक्रमण निरन्तर भइरहेको छ । बाघले आक्रमण गरी मानिसको ज्यान लिने र घाईते बनाउने गरेको छ । सम्बन्धित निकायले मानिसको जिउको संरक्षणलाई प्राथमिकता नदिएको आरोप लगाउँदै स्थानीय आक्रोसित बनेका छन् । वन क्षेत्रलाई तारवार गरी मानिसको जिउधन संरक्षण गर्नुपर्ने माग स्थानीयको छ ।

बाघ आक्रमण रोकथाममा सम्बन्धित निकाय मौन रहेको विरोध जनाउँदै स्थानीयले सोमबार गुलरिया राजापुर सडकमा प्रदर्शन गरेका छन् । आक्रोसित स्थानीयले ओराली बजारस्थित आगजनी गरी प्रदर्शन गरेपछि सडक अस्तव्यस्त बनेको थियो । गुलरिया राजापुर सडक केही बेर पूर्णरुपमा अवरुद्ध रह्यो ।