गठबन्धनको नेतृत्वमा नयाँ सरकार बन्छ : महरा

कालपृष्ठ समाचारदाता
नेपालगन्ज, ९ पुष
नेकपा माओवादी केन्द्रका उपाध्यक्ष कृष्णबहादुर महराले समाजवादी विचार धार अंगालेका शक्तिहरुको एउटा मञ्च निर्माण गर्न थालेका बताएका छन् । नेपालगन्जमा प्रेस सेन्टर बाँकेले आयोजना गरेको पत्रकार सम्मेलनमा पार्टीको प्रवक्तासमेत रहेका महराले यसका लागि आवश्यक छलफलसमेत भइरहेको बताए ।

अहिलेको आवश्यकता भनेको समाजवादी विचार धार भएका शक्तिहरु एकजुट हुनु भएको भन्दै उनले यसका लागि दलहरुसँग छलफल भइरहेको बताए । समाजवादी विचार धारलाई संगठित गर्न नेकपा माओवादीले महरालाई जिम्मेवारी दिएको छ ।

समाजवादी दलहरुको मञ्च निर्माणका लागि नेकपा एमालेका महासचिव शंकर पोखरेल, नेकपा एकीकृत समाजवादी, बाबुराम भट्टराई नेतृत्वको नेपाल समाजवादी पार्टी, नेत्रविक्रम चन्द (विप्लव) नेतृत्वको नेकपा, मोहनविक्रम सिंह, धर्मेन्द्र बाँस्तोलालगायतका पार्टीसँग छलफल भएको उनले बताए ।

साथै नयाँ सरकार निर्माणका विषयमा उनले गठबन्धनकै सरकार बन्ने बताए । प्रधानमन्त्री छनोटका लागि राष्ट्रपतिले दिएको मिति नजिकै आएको भन्दै सरकारको नेतृत्वका विषयमा व्यापक छलफल भएको उनले बताए ।