अन्तिम सेकेन्डमा चुक्यो नेपाल

साफ–महिला यु–२० च्याम्पियनसिप

कालपृष्ठ समाचारदाता
काठमाडौं, २९ असार

इन्जुरी समयको अन्तिम सेकेन्ड्स सम्हालिन नसक्दा नेपालले दक्षिण एसियाली फुटबल महासंघ (साफ) महिला यु–२० च्याम्पियनसिपमा बंगलादेशसँग ३–२ ले पराजय बेहोरेको छ । आइतबार ढाकास्थित बसुन्धरा किङ्स एरिना रंगशालामा घरेली टोली विरुद्धको खेलमा नेपालले उत्कृष्ट कमब्याक गरेको थियो ।

पहिलो हाफमा दुई गोलले पछाडि परेको नेपालले निर्धारित ९० मिनेटमा २–२ को पुनरागमन जनाएको थियो । तर, इन्जुरी समयमा नेपाल अभागिशाली रह्यो । बंगलादेशको जितमा सिन्हा जहान शिखा, मोसम्मत सागोरिका र श्री मोती तृष्णा रानीले गोल गर्नु भयो । नेपालका लागि अनिशा राई र मीना देउवाले गर्नु भएको थियो ।

बंगलादेशले खेलको १३औं मिनेटमा अग्रता लियो । मिडफिल्डर मोसम्मत मुन्की अख्तरले बक्स भित्रबाट गरेको लोअर प्रहार गोलकिपर सुजता तामाङलाई बिट हुँदै गोलमा परिणत हुनै लाग्दा रक्षक गँगा रोकायाले गोल लाइन क्लियरेन्स गर्नु भयो । तर, बक्सभित्र कुनै पनि निगरानीमा नरहेकी सिन्हा जहान शिखाले बललाई पोस्टको दिशा दिनु भयो । मुन्कीले यसअघि नेपालका तीन खेलाडीलाई बिट गर्दै मौका सृजना गर्नु भएको थियो ।

……..

खेलको ३६औं मिनेटमा बंगलादेशले अग्रतालाई दोब्बर बनाएको थियो । लेफ्ट साइडबाट विंगर शान्ती मार्दीको क्रसलाई गोलकिपर सुजताले नियन्त्रणमा लिन सक्नु भएन । विपक्षी अग्रपङ्क्तिको ‘हाइ प्रेसिङ’मा सुजताले बललाई समात्न सक्नु भएन । जसको फाइदा स्ट्राइकर मोसम्मत सागोरिकाले लिनु भयो ।

खेलको ७७औं मिनेटमा नेपालले अनिशा राईको पेनाल्टी गोलमार्फत खेलमा फर्किने संकेत दियो । मोसम्मत जोयनब बिबि रिताले स्ट्राइकर मीनालाई लडाएपछि नेपालले सेटपीस अवसर प्राप्त गरेको थियो । अनिशाले गोलकिपर स्वर्ण रानी मण्डललाई कुनै मौका नर्दि गोल गर्नु भयो ।

निर्धारित समय सकिन चार मिनेट बाँकी रहँदा नेपालले बराबरी गोल गरेको थियो । लेफ्ट साइडबाट स्ट्राइकर पूर्णिमा राईको सुन्दर पासमा विपक्षी रक्षापङ्क्तिको निगरानीमा नरहेकी मीनाले वान टचमा गोल गर्नु भएको थियो ।

इन्जुरी समयको अन्तिम सेकेन्ड्समा उम्हेला माल्माको गतिलाई नेपाली रक्षक माया मास्केले रोक्न सक्नु भएन् । बेन्चबाट मैदान प्रवेश गरेकी उम्हेलाले राइट साइडबाट श्री मोती तृष्णा रानीलाई पास दिनु भयो । नेपाली रक्षकद्धय सरीता नाथ र अनिशा राईको बिचमा रहेकी श्री मोतीले वान टचमा सुजतालाई बिट गर्नु भयो ।

जितसँगै बंगलादेशले उपाधि सम्भावनालाई बलियो बनाएको छ । बंगलादेशले पहिलो खेलमा श्रीलंकालाई ९–१ ले पाखा लगाएको थियो ।

यो जितले बंगलादेशले स्पष्ट ६ अंक जोडेको छ । नेपालले आफ्नो पहिलो खेलमा भुटानलाई ६–१ ले हराएको थियो । चार राष्ट्रको सहभागिता रहेको प्रतियोगितामा डबल राउन्ड रोविन प्रतिस्पर्धापछि समूहको शीर्ष स्थानमा रहने टोली च्याम्पियन बन्नेछ । नेपालले आफ्नो तेस्रो खेलमा मंगलबार श्रीलंकासँग खेल्ने तालिका छ ।