आजदेखि ३ दिन देशभर मौसमी बदली हुने, केही स्थानमा भारी बर्षाको सम्भावना

काठमाण्डौ, २३ भदौ । आजदेखि तीनदिन मौसम बदली हुने भएकाले देशका विभिन्न भागमा विगतको तुलनामा पानी पर्ने क्रम बढ्ने र केही स्थानमा भारी वर्षा हुने भएको छ।

मौसम बदली भई गए रातिदेखि नै मुलुकका विभिन्न स्थानमा पानी परिरहेको जल तथा मौसम विज्ञान विभागले जानकारी दिएको छ।

विभागका अनुसार आजदेखि तीन दिन नै मौसम बदली भई ठाउँठाउँमा पानी पर्ने र केही स्थानमा भारी वर्षाको सम्भावना रहेको छ।

यसैगरी प्रदेश नं १ देखि प्रदेश नं ५ सम्म नै मौसम बदली भइरहेको छ भने हाल मनसुनको न्यून चापीय रेखा औसतभन्दा केही माथि नेपाल नजिक (उत्तरतर्फ) सरेको र स्थानीय वायुको पनि प्रभाव रहेको विभागले जनाएको छ।

आज बिहान तनहुँको स्याम्घा केन्द्रमा भारी वर्षा मापन भएको र थप पर्षा हुने देखिएकाले मादीलगायत साना नदीमा आकस्मिक बाढीको सम्भावना रहेको बाढी पूर्वानुमान महाशखाले जनाएको छ।

यस्तै बिहान उदयपुर जिल्लाको उदयपुरगढी केन्द्रमा पनि भारी वर्षा मापन भएको र थप वर्षा हुने देखिएकाले त्रियुगालगायत साना नदीमा आकस्मिक बाढी हुने सम्भावना छ । त्यसको तटीय क्षेत्र र डुबान भइरहने होचा स्थानमा सतर्क रहन अनुरोध गरिएको छ ।

आज कोशी र नारायणी जलाधारका केही ससाना सहायक नदीमा बहाब बढ्ने र केहीमा आकस्मिक बहाब भई सतर्कता आसपास पुग्न सक्ने जनाइएको छ । यस्तै कन्काई, कमला, वाग्मतीका ससाना नदीको जलाधारमा बहाब बढ्ने र केहीमा सतर्कता आसपास पुग्न सक्ने जनाइएको छ।

विभागले दिएको जानकारी अनुसार अहिले कर्णाली र सुदूरपश्चिम प्रदेशमा समेत मौसम बदली हुन थालेको छ। यसपटक भने प्रदेश १ देखि प्रदेश ५ सम्म बढी बदली हुनेछ भने केही स्थानमा भारी वर्षा हुने भएकाले पहिरो र बाढीको जोखिम हुने सक्ने सम्भावना रहेकाले सावधानी अपनाउन विभागले अनुरोध गरेको छ।