सितापुर युनाइटेड र राईजिङ स्टार दोस्रो योगिनी गोल्ड कपको फाइनलमा

खजुरा, चैत २५ गते

सितापुर युनाइटेड र राईजिङ स्टार क्लब दोस्रो योगिनी गोल्ड कप फुटबल प्रतियोगिताको फाइनलमा प्रवेश गरेका छन् । चैत २९ गते आइतबार दुबै टोलीले प्रतियोगिताको उपाधिको लागि प्रतिस्पर्धा गर्नेछन् । शुक्रबार भएको पहिलो सेमिफाइनल खेलमा सीतापुर युनाइटेडले आयोजक योगिनी युवा क्लब ‘बी’ लाई १–० ले पराजित गरेको थियो । बाँके खजुरा गाउँपालिका वडा नम्बर–२ स्थित योगिनी माविको खेल मैदानमा भएको खेलमा घरेलु टोली विरुद्ध शम्भु थारुले गरेको एकमात्र गोल निर्णायक बन्यो । विपक्षी रक्षक अलमलिएको अवस्थामा थारुले २६औं मिनेटमा गोल गर्नु भयो ।
खेलमा सितापुर युनाइटेडका कप्तान राम ओली प्लेयर अफ द म्याच घोषित हुनु भयो । उहाँलाई प्रतियोगितामा आर्थिक सहयोग गर्ने मोती सुनार र पार्वती शाहीले प्लेयर अफ द म्याचको ट्रफी प्रदान गर्नु भयो । यसैगरी दोस्रो सेमिफाइनलमा राईजिङ स्टार क्लबले आयोजक योगिनी युवा क्लब ‘बी’ लाई पेनाल्टी सुटआउटमा ३–१ ले पराजित गरेको छ ।

निर्धारित समय खेल गोलरहित बराबरीमा सकिएको थियो । पेनाल्टीमा राईजिङ स्टारको तर्फबाट प्रख्यात परियार, क्षितिज रानामगर र समिर कसेराले गोल गर्नु भएको थियो । योगिनी ‘बी’ को तर्फबाट निराजन जंग शाहीले मात्र गोल गर्नु भयो । खेलमा राईजिङ स्टारका गोलकिपर गोकर्ण पुनले प्लेयर अफ द म्याचको ट्रफी प्राप्त गर्नु भयो । उहाँलाई प्रतियोगिता आयोजना गर्न सहयोग गर्नु हुने पिमति राना क्षेत्री र नन्द बहादुर खत्रीले पुरस्कृत गर्नु भयो ।

योगिनी युवा क्लबको आयोजनामा भैरहेको प्रतियोगितामा बाँके र बर्दियाका १३ टिमको सहभागिता रहेको छ । चैतको २९ गते सम्म चल्ने प्रतियोगितामा मोडेल एफसी क्लब, सीतापुर युनाइटेड, जय किसान स्पोर्टस क्लब, मानवी स्पोर्टस क्लब, २७ स्टार क्लब, राईजिङ स्टार, एक्स आर्मी लेजेन्ड, चन्द्र ज्योती युवा क्लब, केवाईसी, योगिनी युवा क्लब ‘ए’ र एक्टिभ युवा क्लबको सहभागिता रहेको आयोजक योगिनी युवा क्लबका अध्यक्ष कमल पुनले बताउनु भयो ।

……………

प्रतियोगिताको विजेताले ५१ हजार, उपविजेताले २५ हजार पुरस्कार पाउनेछन् । प्रतियोगिताको सर्वोत्कृष्ट खेलाडी, उत्कृष्ट गोलकिपर, उत्कृष्ट रक्षक, उत्कृष्ट मिडफिल्डर र उत्कृष्ट स्ट्राइकरलाई पुरस्कृत गरिने आयोजक क्लबका अध्यक्ष पुनले बताउनु भयो ।

………….