दिल्लीलाई हराउँदै मुम्बई शीर्ष स्थानमा उक्लियो

२६ असोज, काठमाडौं । यूएईमा जारी इन्डियन प्रिमियर लिग (आईपीएल)मा मुम्बई इन्डियन्स शीर्ष स्थानमा उक्लिएको छ । आइतबार राति भएको खेलमा दिल्ली क्यापिटल्सलाई ५ विकेटले हराउँदै मुम्बई शीर्ष स्थानमा उक्लिएको हो ।

शेख जायद स्टेडियममा दिल्लीले प्रस्तुत गरेको १६३ रनको लक्ष्यसहित जवाफी ब्याटिङमा उत्रिएको मुम्बईले १९ ओभर ४ बलमा पाँच विकेट गुमाएर भेट्टायो ।

मुम्बईलाई जिताउन क्वीन्टन डी कक र सूर्यकुमार यादवले समान ५३ रनको अर्धशतकीय इनिङ्स खेले । इशान किशनले २८ रन बनाए भने क्रुनाल पाण्ड्याले नटआउट १२ तथा किरोन पोलार्डले अजिवित ११ रन जोडे । कप्तान रोहित शर्मा ५ रनमै आउट भए ।

दिल्लीका कागिसो रबडाले दुई विकेट लिँदा अक्षर पटेल, रवीचन्द्रन आश्विन र मार्कुस स्टोइनिसले समान १–१ विकेट लिए ।

त्यसअघि टस जितेर ब्याटिङ रोजेको दिल्लीले निर्धारित २० ओभर खेल्दा ४ विकेटको क्षतिमा १६२ रन बनाएको थियो ।

दिल्लीका लागि शिखर धवनले अर्धशतकीय पारी खेले । ५२ बल खेलेका उनले ६ चौका र एक छक्कको मद्धतले ६९ रन बनाए । धवनले आईपीएलमा सयौं छक्का पनि पूरा गरे ।

यस्तै कप्तान श्रेयस अय्यरले ४२ रन बनाउँदा अजिन्क्या रहानेले १५ तथा एलेक्स क्यारीले अजिवति १४ रन जोडे । मार्कुस स्टोइनिसले १३ रन जोड्दा पृथ्वी श ५ रनमा आउट भए ।

मुम्बईका क्रुनाल पाण्ड्याले दुई विकेट लिँदा ट्रेन्ट बल्टले एक विकेट लिए ।

जितसँगै मुम्बई १० अंकस जोड्दै शीर्ष स्थानमा उक्लियो । समान १० अंक नभै भएको दिल्ली दोस्रो स्थानमा रहेको छ । ऊ रन रेटका आधारमा मुम्बईभन्दा पछाडि परेको छ ।