पहिरोमा परेर एकै परिवारका दुईसहित तीन जनाको मृत्यु

कालपृष्ठ डेस्क, दार्चुला, २४ असार-
दार्चुलामा पहिरोमा परेर एकै परिवारका दुईसहित तीन जनाको मृत्यु भएको छ । जिल्लाको नौगाड गाउँपालिका-३ खार नजिकैको चौखुट्टेमा अविरल वर्षासँगै आएको पहिरोले घर पुरिँदा दुई जना र पहिरोमा परेर थप एक जनाको मृत्यु भएको प्रहरीले जनाएको छ ।
पहिरोले घर पुरिँदा स्थानीय ७२ वर्षीया गेउली ठगुन्ना र उनकी ३ महिनाकी नातिनी मन्जरी ठगुन्नाको मृत्यु भएको जिल्ला प्रहरी कार्यालय दार्चुलाका प्रमुख, प्रहरी नायब उपरीक्षक मनोहर भट्टले जानकारी दिए ।
यस्तै घट्ट जाने क्रममा आएका सोही ठाउँका २९ वर्षीय लक्ष्मण सितौलीको पनि मृत्यु भएको डिएपी भट्टले बताए । उनीहरु तीनै जनाको शव पहिरोबाट निकालिएको छ । पहिरोमा परेर नौगाड गाउँपालिका-३ कै १८ वर्षीया हरमती ठगुन्ना सामान्य घाइते भएको उनले बताए ।