किशोरीलाई पाठेघरको क्यान्सर विरुद्ध खोप लगाईने

रजनी योगी
नेपालगन्ज, २४ भदौं

नेपालमा महिलाहरुमा हुने क्यान्सर मध्ये पहिलो नम्बरमा रहेको पाठेघरको क्यान्सर विरुद्धको खोप लगाउने कार्य नेपालगन्जमा आगामी बुधबार देखी सुरु हुने भएको छ । नेपालगन्ज स्थित भेरी अस्पतालमा लगाइने खोप भदौं ३० गतेसम्म चल्नेछ । लुम्बिनी प्रदेशको प्रतिनिधीत्व गर्दै बाँकेको भेरी अस्पतालमा यो खोप संचालन हुन लागेको हो ।

खोपले ९५ प्रतिशत क्यान्सर न्युनिकरणमा सहयोग पुग्ने स्वास्थ्य सेवा विभाग परिवार कल्याण महाशाखाका बरिष्ठ जनस्वास्थ्य अधिकृत संजय कुमार महासेठले जानकारी दिए । १४ वर्ष पुरा १५ वर्ष ननाघेका किशोरीलाई उक्त खाप दिईने छ । देशभर २० हजार किशोरी र लुम्बिनी प्रदेशमा मात्रै १ हजार २ सय १५ जनालाई सुरुआती चरणमा खोप दिईने छ ।

विशेषगरी ३५ देखि ६४ वर्षका महिलामा पाठेघरको मुखको क्यान्सरको जोखिम देखिएको छ । १० देखि १४ वर्षका किशोरीलाई खोप दिन मिल्ने भएपनि अहिलेलाई १४ वर्ष पुरा भएका किशोरिलाई मात्रै खोप दिईने छ । २०६५ भाद्र ३० गतेदेखि २०६६ भाद्र ३० गतेभित्र जन्मेका लुम्बिनी प्रदेशका किशोरी खोप दिईने पनि बरिष्ठ जनस्वास्थ्य अधिकृत महासेठले आइतबार भएको अन्तरक्रियामा बताए ।

पाठेघरको मुखको क्यान्सर हुनुमा ह्युमन पालिलोमा भाइरस प्रमुख कारण मानिएको छ । सन् २०३० सम्म १५ वर्षमूनीका बालिकाहरुमध्ये ९० प्रतिशतलाई पाठेघरको मुखको क्यान्सर विरुद्धको खोप पूर्ण रुपमा प्रदान गरिनेछ ।
कार्यक्रमका प्रमुख अतिथी जिल्ला समन्वय समिति बाँकेका अध्यक्ष ज्ञानेन्द्र कुमार चौधरीले महिलाहरुको लागि पाठेघरको मुखको क्यान्सर निकै जोखिमपूर्ण भएकाले यो खोपले क्यान्सर न्युनीकरणमा सहयोग गर्ने अपेक्षा गरिएको बताए ।

खोप अति आवश्यक भएपनि खोप अभाव भएकाले यस्को मात्रा बढाउन सकेको भए प्रभावकारी हुने उनको सुझाव छ । यसैगरी जिल्ला समन्वय समिती बाँकेका उपाध्यक्ष सिता कार्कीले खोपको मात्रा थोरै भएपनि हामिले खोप लगाउन पाउनुमा आफुलाई भाग्यमानी ठानेको बताईन् । खोप थोरै हुनुमा विरोध गर्नु भन्दा पनि समर्थन गर्नुपर्नेमा उनको जोड छ ।

यस्तै, भेरी अस्पतालका मेडिकल सुपरिटेन्डेन्ट डा. पवन रायमाझीले अहिले यो खोप १ सय ३० राष्ट्रले सुरु गरिसकेको बताउँदै खोप सिमित भएपनि केही व्यक्तिले पाउने र बाँकीले आगामी आर्थिक वर्षमा प्राप्त गर्ने उनले जानकारी दिए ।
स्वाथ्य तथा जनसंख्या मन्त्रालय स्वास्थ्य सेवा विभाग अन्तर्गतको परिवार कल्याण महाशाखाको आयोजनामा पाठेघरको मुखको क्यान्सर रोग विरुद्धको एच पि भि खोप अन्तरक्रिया कार्यक्रममा उक्त जानकारी गराईएको हो । कार्यक्रममा विभिन्न पालिकाका प्रतिनिधी, स्वास्थ्य शाखा प्रमुखहरु, विभिन्न विद्यालयका प्रधानाध्यापक, स्वास्थ्यकर्मी, पत्रकार लगायतको उपस्तिथी थियो ।